自然友善 Natural Friendly

以前成日聽到鄰埠有膠樽回收機，一直都好想去睇下。點知，近期環保局都推出左部智能膠樽回收機，今日終於去到環保局大堂（即係電力公司大堂）既膠樽回收機見真身啦，睇下好唔好用先。

先講下個回收前要準備既野先:

1. 首先就要記得將膠樽清洗乾淨，千析唔好殘留任何液體；
2. 膠樽回收機可接收容量為1.5公升、直徑小於12公分以下既 1號PET／PETE膠樽；
3. 不用撕開招紙和樽蓋，因為需要嘟招紙上面既條碼(Barcode)先可以放入膠樽回收機；

基本操作

其實部機有4個主要部件

主螢幕
掃描器
環保FUN QR CODE
膠樽投放口

主螢幕上唔係好多選項，夠哂簡潔，主要按鈕都係『開始回收』、『環保FUN會員卡』等，仲有一啲乾淨回收等提示；格離有個掃描器，主要係掃『環保FUN會員卡』同埋『膠樽條碼』，掃完之後，就可以直接將膠樽放入『膠樽投放口』啦！！由於部份飲品資料未齊全，可能有部份既樽未能投入部機度，咁就可以直接放落隔離個膠樽回收箱度。

回收機的主要操作圖示

未能投放到回收機的膠樽，可以放在膠樽回收箱

使用上都幾方便，但如果你係環保FUN會員或者想做會員，其實都可以掃格離既『申請環保FUN』QR CODE，咁就可以儲埋積分啦。下面就分幾個情況嚟講下：

有帶環保fun實體卡
- 可以直接係掃描器度嘟實體卡條碼，跟住嘟膠樽就可以乾淨回收；
無帶環保fun實體卡
- 可以掃『申請環保FUN』QR CODE，跟住再按『環保FUN電子卡重發／找回』，咁就可以變成電子卡啦，以後唔使再袋住張實體卡，跟住就可以乾淨回收啦！
新申請環保fun電子卡
- 如果你本身冇環保FUN，但又想申請儲積分，可以掃『申請環保FUN』QR CODE，再揀『環保FUN電子卡登記』，填完簡單資料就可以回收兼儲積分啦！！
非會員回收
- 只需要掃膠樽條碼，就可以回收嫁啦。